Enes ibn Maliku r.a. i shërbeu të Dërguarit të All-llahut s.a.v.s. për dhjetë vjet me radhë.
Dhjetë vjet janë kohë e mjaftueshme për ta njohur mirë karakterin e një njeriu — ta shohësh si reagon kur është i lodhur, kur është në nxitim, kur është i stresuar apo në punët e përditshme.
Për këtë përvojë, Enesi r.a. tregon:
“I kam shërbyer të Dërguarit të All-llahut për dhjetë vjet. Gjatë gjithë kësaj kohe, kurrë nuk më tha as një ‘Uf!’ të vetme. Kurrë nuk më pyeti për diçka që bëra: ‘Pse e bëre?’, e as për diçka që nuk e bëra: ‘Pse nuk e bëre?’”
Kjo dëshmi e tregon qartë lartësinë e karakterit të tij. Ai nuk kërkonte shkaqe për të kritikuar dhe nuk e përdorte autoritetin e vet për t’i mbajtur të tjerët nën presion.
Mënyra se si sillemi me ata që na shërbejnë, na ndihmojnë apo punojnë për ne, është pasqyra më e vërtetë e karakterit tonë. Është e lehtë të jesh i sjellshëm me dikë nga i cili pret diçka, por vlerat e vërteta duken te mënyra se si i trajtojmë ata ndaj të cilëve kemi epërsi.
Enesi r.a. e jetoi nga afër këtë mirësi për dhjetë vjet dhe e ruajti në kujtesë butësinë e tij të jashtëzakonshme.
Redaksia
Xhamia Rabia - Debresh 