Jashtë shtëpisë, ai ishte i Dërguari i All-llahut ﷺ. I udhëhiqte njerëzit, i mësonte ata, priste delegacione, i zgjidhte konfliktet e tyre dhe mbante mbi supe përgjegjësinë e të gjithë Ummetit.
Po kur hynte brenda dyerve të shtëpisë së tij?
Aisheja (r.a.), e cila e njihte më së miri jetën e tij private, u pyet pikërisht për këtë: “Çfarë bënte i Dërguari i All-llahut ﷺ në shtëpi?”
Ajo u përgjigj:
“Ai i shërbente familjes së tij, ndërsa kur vinte koha e namazit, dilte për t’u falur.” (Transmeton Buhariu, nr. 676)
Fytyra e vërtetë e njeriut shfaqet atëherë kur mbyllen dyert e shtëpisë. Aty nuk ka publik, nuk ka kamera dhe as nevojë për t’i provuar gjë kujt. Pejgamberi ﷺ e ruante të njëjtën madhështi e thjeshtësi edhe brenda vatrës familjare, duke ndihmuar me përulësi në punët e shtëpisë.
Njerëzit e mëdhenj nuk zvogëlohen kur ndihmojnë në shtëpi; përkundrazi, madhështia e vërtetë e njeriut matet nga mënyra se si sillet me njerëzit e tij më të afërt.
Redaksia,
[Xhamiarabia.info]
Xhamia Rabia - Debresh 